ᑎᐅᕆᓐᔅ ᐅᔭᕋᒃ-ᑎᐅᕆ ᐅᔭᕋᒃ ᐃᒻᒥᓂᒃ-ᐃᓕᑦᑎᓯᒪᔪᖅ ᐃᖖᒋᖅᑎ/ᓂᔾᔭᐅᓯᔮᒃᓴᓕᐅᖅᑎ ᓂᔾᔭᐅᓯᔭᖅᑎ ᐃᒡᓗᖕᒥᐅᑕᖅ, ᓄᓇᓕᕋᓛᖅ ᓄᓇᓕᑦᑎᐊᕙᒃ ᐅᑭᐅᖅᑕᖅᑐᕐᒥ ᑲᓇᑕᐅᑉ ᓄᓇᕕᖓᑕ ᕿᑭᖅᑖᓘᓪᓗ ᐊᑯᓐᓂᖓᓂ ᓄᓇᕗᒻᒥ. ᐃᒡᓗᓕᒃ ᓄᓇᑦᑎᐊᕙᒃ ᑲᓇᑕᐅᑉ ᐅᑭᐅᖅᑕᖅᑐᖓᓃᑦᑐᖅ, ᐃᓄᐃᑦ ᐅᖃᐅᓯᖓᑦ ᐃᓕᖅᑯᓯᖓᓗ ᓴᖅᑭᔮᑦᑎᐊᖅᑐᖅ ᐃᓅᓯᕐᒦᖏᓐᓇᖅᑐᓂᓗ, ᓄᓇᖅᑲᑎᒌᑦᑎᐊᖅᑐᑎᒡᓗ.

ᑎᐅᕆᐅᑉ ᓴᖅᑭᒋᐊᖖᒐᖅᑕᕕᓂᖓ ᓄᓇᕐᔪᐊ ᐃᓱᓕᖏᓐᓂᖓᓂ ᓴᖅᑭᑕᐅᓂᑯᑦ ᔭᐃᔅ ᓚᓯᐊᒃᒧᑦ ᑲᑎᑦᑎᓯᒪᔪᖅ ᐅᓂᒃᑳᖅᑐᐊᕐᓂᒥᒃ, ᓂᐱᓕᖕᓂᒡᓗ ᐃᖖᒋᐅᓯᖃᖅᑐᓂ ᓈᓚᒃᑐᒧᑦ ᐱᖃᓯᐅᔾᔭᐅᓇᖅᑐᓂ, ᕿᒧᒃᓯᒃᑯᑦ. ᐱᖃᓯᐅᑦᑐᒋᑦ ᐃᖖᒋᐅᓯᐅᕐᓂᖓ, ᓴᖅᑭᔮᖅᑎᑦᑎᔪᖅ ᐅᐃᒋᔭᐅᓪᓗᓂ, ᐊᑖᑕᐅᓪᓗᓂ, ᐊᖑᓇᓱᒃᑎᐅᓪᓗᓂᓗ; ᐃᒡᓗᓕᖕᒥᐅᑕᐅᓪᓗ ᓴᐃᒪᓐ ᖃᒪᓂᐅᑉ ᐅᓂᒃᑳᖅᑐᐊᖅᑕᖓᓂ, ᐃᒃᐱᒍᓱᓪᓚᕆᖕᓇᖅᑐᖅ ᓇᑭᖖᒑᖅᓯᒪᓂᖏᓐᓂᒃ.

ᑎᐅᕆ ᐋᓪᓚᐅᖖᒋᓚᖅ ᓄᓇᕗᒻᒥ ᓂᔾᔭᐅᓯᔭᖅᑎᓄᑦ, ᖁᓕᑦ ᐊᕐᕌᒍᑦ ᐅᖓᑖᓄᑦ ᐱᖖᒍᐊᖅᑎᐅᓯᒪᔪᖅ, ᐃᓪᓗᑭᓵᖅᑎᐅᓪᓗᓂ, ᓂᔾᔭᐅᓯᔭᖅᑎᐅᓪᓗᓂᓗ, ᓄᓇᕐᔪᐊᕐᒥ ᓇᕈᓇᒃᓯᒪᔪᖅ ᐃᓄᖕᓂᒃ ᑕᑯᓐᓇᒐᕐᓂᒃ ᐱᖃᑕᐅᓪᓗᓂ, ᐋᖅᓯᒃᑯᓐᓄᑦ. ᐊᖑᓇᓱᒃᑎᓪᓚᕆᒃ, ᐱᖃᑕᐅᖃᑦᑕᓪᓚᕆᒃᓯᒪᔪᖅ ᐋᖅᓯᒃᑯᑦ ᐃᓕᖅᑯᓯᕐᒥ ᐊᐅᓪᓚᐅᑎᖃᖅᓯᒪᑎᓪᓗᒋᑦ ᓄᓇᒧᑦ. ᑎᐅᕆ ᐋᖅᓯᒃᑯᓐᓄᑦ ᑕᑯᕋᕐᓂᖅᑐᒃᓴᓂᒃ ᑐᑭᒧᐊᒃᑎᑦᑎᔨᐅᖃᑕᐅᕗᖅ ᐃᓐᓇᕆᔭᐅᓪᓗᓂ. ᑕᑯᕋᓐᓈᖅᑕᐅᖃᑦᑕᖅᓯᒪᕗᖅ ᐋᖅᓯᒃᑯᓐᓄᑦ ᕚᓐᑰᕗᒥ ᐅᓕᒻᐱᒃ ᐱᖖᒍᐊᕐᕕᔾᔪᐊᖅᑎᓪᓗᒋᑦ, ᖁᐃᓐ ᐃᓕᓴᐱᐅᑉ ᑕᐃᒪᓐ ᔫᐱᓖᖓᓂ ᐊᒥᓱᓂᒡᓗ ᑕᑯᕋᓐᓈᕐᓂᖃᖅᑎᓪᓗᒋᑦ 4 ᓄᓇᕐᔪᐊᑉ ᐊᕕᓯᒪᓂᖏᓐᓂ. ᐅᔾᔨᕐᓇᒻᒪᕆᒃᑐᖅ, ᑎᐅ ᐊᖑᓇᓱᒃᑎᒻᒪᕆᒃ ᖃᐅᔨᒪᓂᑐᖃᕐᓂᒡᓗ ᐸᐸᑦᑎᔨᐅᓪᓗᓂ, ᓴᖅᑭᔮᒐᔪᒃᑐᖅ ᐱᓕᕆᐊᖏᑎᒍᑦ. ᒫᓐᓇᕋᑖᖅ, ᑎᐅ ᑐᑭᒧᐊᒃᑎᑦᑎᔨᐅᖃᑎᖃᓚᐅᕐᒥᔪᖅ ᐱᖖᒍᐊᖃᑕᐅᓪᓗᓂᓗ ᐊᔾᔨᒌᖖᒋᑦᑐᑎᒍᑦ ᓴᖅᑭᔮᖅᑎᑕᐅᔪᒥ, ᐅᓂᒃᑳᖅᑐᐊᖅ, ᓇᕈᔪᕕᓂᖅ ᑲᓇᑕᓕᒫᒥ 2020-ᐅᑎᓪᓗᒍ.