ᐊᕙᑎᖃᖅᑐᓂ ᐃᑲᔪᖅᓱᖅᑐᓂ ᑎᑎᖅᑭᕆᔪᓐᓇᖅᓯᕚᓪᓕᕐᓂᕐᒥᒃ ᐱᓕᕆᓗᐊᕋᑎᒃ. ᐃᓱᒪᒋᒋᐊᕐᓂᐊᖅᐸᓯ ᐅᑯᐊ:

 

– ᑕᑯᖅᑯᑎᓗᒍ ᐅᖃᓕᒫᒐᐃᑦ ᐊᑑᑎᖃᕐᓂᖏᓐᓂᒃ ᓲᕐᓗ ᐅᖃᓕᒫᒐᒃᑯᕕᖃᕐᓗᓯ ᐃᒡᓗᔅᓯᓐᓂ. 

– ᐅᖃᓕᒫᖅᐸᓪᓗᓯ ᖃᐅᑕᒫᑦ. ᐅᖃᓕᒫᖃᑎᒋᕙᒃᑯᔅᓯᐅᒃ ᑕᕝᕙᓂᔅᓴᐃᓐᓇᖅ ᑐᑭᓯᒐᔭᖅᑐᑦ ᐅᖃᓕᒫᕐᓂᐅᑉ ᐱᒻᒪᕆᐅᓂᖓᓂᒃ.

– ᐊᑲᕐᕆᓇᖅᑐᒥ ᓇᓂᓯᕙᓪᓗᓯ ᐅᖃᓕᒫᕈᔾᔨᓂᐊᓕᕈᔅᓯ ᕿᑐᕐᖓᕐᓂᒃ. ᐅᓚᕕᑕᐅᓇᖖᒋᑎᒋᐊᕐᓗᒍ ᖃᒥᓪᓗᒋᑦ ᑏᕖ, ᓈᓚᐅᑦ, ᐊᒻᒪ ᑲᑉᐳᔾᔭᖅᑐᓖᑦ, ᖃᒥᓪᓗᒋᓪᓗ ᐃᑭᐊᖅᑭᕕᒃᑯᑦ ᐅᖃᓕᒫᕈᑎᒃᑯᑦ ᑐᓴᖅᑎᑦᑎᕝᕙᓪᓕᐊᔾᔪᑎᑦ.
– ᕿᑐᕐᖓᓯ ᑕᑯᑎᑉᐸᓪᓗᒋᑦ ᐅᖃᓕᒫᕐᓂᕐᓂᑦ ᑎᑎᕋᕐᓂᕐᓂᓪᓗ. ᓱᕈᓰᑦ ᖃᐅᔨᔪᒪᓲᖑᒻᒪᑕ ᐃᓐᓇᐃᑦ ᖃᓄᐃᓕᐅᕐᒪᖔᑕ. ᕿᑐᕐᖓᐃᑦ ᑕᑯᕙᑉᐸᑦ ᐅᖃᓕᒫᕐᓂᕐᓂᒃ ᑎᑎᕋᕐᓂᕐᓂᓪᓗ ᖁᕕᐊᒋᓗᒋᑦ, ᖃᐅᔨᔪᒪᓂᖅᓴᐅᑐᐃᓐᓇᕆᐊᓖᑦ ᐅᖃᓕᒫᕐᓂᕐᒥᒃ ᑎᑎᕋᕐᓂᕐᒥᒡᓗ!
– ᐅᖃᖃᑎᒋᕙᓪᓗᒍ ᐱᓕᕆᑎᓪᓗᓯ ᐃᒡᓗᔅᓯᓐᓂ, ᐱᓱᖃᑎᒋᓗᒋᑦ, ᓂᕆᓐᓇᒥᓗ. ᐅᖃᓪᓚᖃᑎᒋᕙᓪᓗᓯᐅᒃ ᑭᓱᑐᐃᓐᓇᐃᑦ ᒥᒃᓵᓄᑦ ᐅᖃᐅᓯᕐᓂᒃ ᑐᓴᓕᒪᖖᒋᑕᖏᓐᓂᒃ ᑐᓴᖅᑎᑦᑎᕙᖕᒪᑕ. 

– ᐅᓂᒃᑳᕐᕕᒋᕙᒃᑯᔅᓯᐅᒃ ᐅᓂᒃᑳᕈᓐᓇᖅᓯᓂᐊᕐᒥᔪᑦ. 

– ᕿᑐᕐᖓᓯ ᐱᕕᖃᖅᑎᖃᑦᑕᖅᓯᐅᒃ ᐊᒥᐊᕆᔪᓐᓇᕐᓗᑎᒃ, ᑎᑎᖅᑐᒐᕈᓐᓇᕐᓗᑎᒃ, ᒥᖑᐊᕆᔪᓐᓇᖅᑎᓪᓗᒋᓪᓗ. ᕿᑐᕐᖓᓯ ᐱᓕᕆᕙᒡᓗᓂ, ᐃᓕᓐᓂᐊᕐᕕᖕᒨᖅᐸᑦ ᐱᕙᒌᔭᖅᓯᒪᒃᑲᓐᓂᕐᓂᖅᓴᐅᒐᔭᖅᑐᖅ.

 

– ᐅᖃᓕᒫᖅᑎᓪᓗᓯ ᓂᐱᓯ ᐊᓯᔾᔨᖅᑕᖅᑎᖅᐸᓪᓗᓯᐅᒃ ᐅᓂᒃᑳᖑᔪᑦ ᒪᓕᒡᓗᒋᑦ ᖃᓄᐃᖖᒍᐊᕐᓃᓪᓗ. ᐅᖃᓕᒫᖅᑎᓪᓗᓯ, ᐊᔾᔨᖖᒍᐊᖏᑦ ᐅᖃᐅᓯᖅᑕᖏᓪᓗ ᐅᖃᐅᓯᕆᖃᓯᐅᑎᕙᓪᓗᓯᐅᒃ. 

– ᐊᐱᕆᕙᖕᒥᓗᒋᑦ ᓇᐃᑦᑐᓂᒃ ᖃᓄᐃᖖᒍᐊᖅᑐᖃᕐᓂᐊᓕᕐᒪᖔᑦ (ᓲᕐᓗ., “ᓇᓄᖅ ᐅᑎᒃᑲᓐᓂᕐᓂᐊᖅᐸᓪᓚᐃᕙ?”) ᑕᑯᔭᒥᒃᑕ ᑐᓴᖅᑕᒥᒃᑕᓗ ᒥᒃᓵᓄᓪᓗ. 

– ᕿᑐᕐᖓᐃᑦ ᐅᓂᒃᑳᕐᒧᑦ ᐱᖃᓯᐅᑎᑎᑉᐸᓪᓗᒍ ᐅᖃᐅᓯᕐᓂᒃ ᖃᐅᔨᒪᔭᒥᖕᓂᒃ ᐃᓕᓴᕆᔭᒥᖕᓂᓪᓗ ᑎᒃᑯᐊᖅᑎᑉᐸᓪᓗᓯᐅᒃ ᑐᓴᕈᒥᒋᔭᒥᒃᑕᓗ ᒥᒃᓵᓄᓪᓗ.
– ᕿᑐᕐᖓᓯ ᐊᔾᔨᓯᔪᓐᓇᖅᐸᓪᓗᑎᒃ ᐅᖃᓕᒫᒐᕐᒥᒃ. ᓲᕐᓗ, ᐅᖃᓕᒫᒐᖅ ᐱᔾᔪᑎᖃᖅᐸᑦ ᐆᒪᔪᓂᒃ, ᐊᑐᖅᓯᒪᔭᕐᓂᒃ ᐆᒪᔫᑉ ᒥᒃᓵᓄᑦ ᐅᖃᓪᓚᐅᑎᒋᓗᒍ.
– ᐅᖃᓕᒫᓕᖅᑭᓕᒃᑖᕙᓪᓗᒍ ᐅᖃᓕᒫᒐᓐᓇᕆᔭᖓ. ᐅᖃᐅᓯᕐᓂᒃ ᐃᓕᑦᑎᔾᔪᑎᒋᓂᐊᖅᑕᖏᑦ ᐅᖃᓕᒫᕐᓂᕐᒥᒡᓗ ᐃᓕᑦᑎᕕᒋᓗᓂᒋᑦ. 

– ᕿᑐᕐᖓᓯ ᓂᕈᐊᖅᓯᑎᑉᐸᓪᓗᒋᑦ ᐅᖃᓕᒫᒐᕐᓂᒃ ᐅᖃᓕᒫᒐᐅᓪᓗ ᒥᒃᓵᓄᑦ ᐃᓱᒪᒋᔭᒥᖕᓂᓪᓗ ᐅᖃᐅᖅᓯᖃᖅᐸᓪᓗᑎᒃ ᐅᖃᕈᓐᓇᖅᑎᑉᐸᓪᓗᒋᑦ.